काठमाडौँ, पुष ७ –

शनिबार बिहान काठमाडौँको दरबारमार्गस्थित लिक्विड लाउन्जमा गृहमन्त्री रमेश लेखकका नातेदार रमेश भट्टमाथि कुटपिट भएको छ। घटनामा संलग्न रहेको आरोपमा आठ जनालाई प्रहरीले नियन्त्रणमा लिएको छ।

घटना बिहान करिब ३ः४५ बजे भएको हो। कुटपिटमा संलग्नहरू काभ्रे र आसपासका विभिन्न स्थानका युवा हुन्। पक्राउ परेकामध्ये कुलध्वज लामा (रोशी गाउँपालिका–४), सुजन लामा (भुम्लु गाउँपालिका), र सुलभ पहारी (भुम्लु गाउँपालिका) विशेष रूपमा चिनिएका तरुण दलका कार्यकर्ता हुन्।

तरुण दलका पदाधिकारीहरू पक्राउ

पक्राउ परेकामध्ये कुलध्वज लामा कांग्रेसको भातृ संगठन तरुण दलका केन्द्रीय सदस्य हुन् भने सुजन लामा काभ्रेको तरुण दल अध्यक्ष र सुलभ पहारी भुम्लु इकाई समितिको अध्यक्ष हुन्। उनीहरू गुण्डा नाइके दावा लामाको समूहमा आबद्ध रहेको बताइएको छ।

अन्य पक्राउ परेका व्यक्ति

पक्राउ पर्ने अन्यमा काभ्रेका मिलन लामा, युवराल लामा, सिन्धुपाल्चोकका दावा लामा, मोरङका डम्बर कार्मी र काभ्रेका शक्ति लामा छन्।

घटनाको पृष्ठभूमि

काभ्रेली समूहका नामले चिनिने यी युवा समूहले गृहमन्त्रीका नातेदार रमेश भट्टमाथि किन आक्रमण गरे भन्ने विषयमा प्रहरीले अनुसन्धान गरिरहेको छ। कुटपिटको कारण र लिक्विड लाउन्जमा भएको विवादका विषयमा थप विवरण आउन बाँकी छ।

प्रहरीले लाउन्जका सञ्चालक सञ्जीव लामा ‘स्याल’सँग समेत सोधपुछ गरिरहेको छ। घटनाको थप अनुसन्धान जारी छ।

• Jigyasa media