काठमाडौं, १६ भदौ - एभरट्रष्ट बचत तथा ऋण सहकारी संस्था लिमिटेडमा भएको रकम हिनामिना प्रकरणमा सहकारीकी उपाध्यक्षसहित पाँच जनालाई पक्राउ गरिएको छ।
पक्राउ पर्नेहरूमा सहकारीकी उपाध्यक्ष बविता डंगोल, सचिव कान्छाभाई डंगोल, कोषाध्यक्ष विष्णुप्रसाद फुयाल, सदस्य रामलाल महर्जन, र अमरभाई बज्राचार्य रहेका छन्। उनीहरूलाई प्रहरीको केन्द्रीय अनुसन्धान ब्यूरो (सीआईबी)ले पक्राउ गरेको हो।
सीआईबीका अनुसार उनीहरूमाथि ठगीको आरोपमा ८ दिनको म्याद लिएर अनुसन्धान भइरहेको छ। काठमाडौंको चुच्चेपाटीस्थित यो सहकारीमा बचतकर्ताहरूको १५ करोड ९१ लाख ४ हजार ७६३ रुपैयाँ अपचलन भएको प्रारम्भिक अनुसन्धानले देखाएको छ।
सीआईबीले यस सहकारीबाट पीडित भएकाहरूलाई सम्पर्कमा आउन अनुरोध गरेको छ।
- Jigyasa media
