सिरहा, ५ कात्तिक – आपसी विवादकै कारण आफ्नै साथीको हत्या गरेको आरोपमा सिरहामा पाँच जना पक्राउ परेका छन्। जिल्ला प्रहरी कार्यालय सिरहाले गोलबजार नगरपालिका-१३, डंगराहा टोलका सन्तोष कुमार महरा, रोहित कुमार महरा, धर्मेन्द्र महरा, धिरज कुमार राम, र मोहमद जमसेदलाई पक्राउ गरिएको जानकारी दिएको छ। उनीहरूलाई आफ्नै साथी कृष्ण कुमार महराको हत्या गरेको आरोप लागेको हो।

असोज २७ गते राति कृष्ण र रोहित सुखिपुर नगरपालिका-१०, शिवचौकस्थित दुर्गा पूजाको मेलामा पुगेका थिए। त्यहाँ अन्य साथीहरूसँग भेट भएपछि उनीहरूले गाँजा र नशालु औषधि सेवन गरेका थिए। प्रारम्भिक अनुसन्धानले देखाएअनुसार, कृष्णले एक महिला साथीलाई भेट्न बोलाएको थियो, तर अन्य साथीहरूले पनि भेट्ने इच्छा देखाउँदा कृष्णले इन्कार गरेका थिए। यही विषयलाई लिएर उनीहरूबीच विवाद भएको थियो, जसले हत्या योजना सम्मको रूप लियो।

हत्या योजना अनुसार, मोहमद जमसेद, धिरज कुमार राम, धर्मेन्द्र महरा, सन्तोष कुमार महरा, र रोहित कुमार महराले कृष्णलाई चारैतिरबाट घेरा हालेर धारिलो कैंचीले उनको घाटी र पेटमा क्रुर आक्रमण गरेका थिए। घटनापछि अभियुक्तहरूले गागन खोलाको किनारमा खाल्डो खनी शवलाई बालुवाले छोपेर फरार भएका थिए।

असोज २८ गते कृष्णको शव फेला परेको थियो, जसपछि प्रहरीले अनुसन्धान अघि बढाउँदै आफ्नै साथीहरूबाट हत्या भएको पुष्टि गरेको थियो। शुक्रबार अभियुक्तहरूलाई पक्राउ गरी अदालतबाट म्याद थप अनुसन्धान भइरहेको प्रहरीले जनाएको छ।

• Jigyasa media