२४ मंसिर, काठमाडौं । सिरियाका राष्ट्रपति बसर अल असद परिवारसहित रूसको राजधानी मस्को पुगेका छन्। रूसी सरकारी समाचार एजेन्सीका अनुसार असद र उनको परिवारलाई रूसले शरण दिएको छ।

रिपोर्टअनुसार असदलाई रूसले मानवीय दृष्टिकोणका आधारमा मस्कोमा शरण दिएको हो। अलजजिराका अनुसार असद र उनका परिवारलाई रूसले संरक्षण दिएको दाबी गरिएको छ। बीबीसीले असदको मस्को उपस्थितिको पुष्टि भने गर्न नसकेको जनाएको छ।

राजधानी छोडेर भागे असद

विद्रोही समूह हयात तहरिर अल शाम (एचटीएएस) ले आइतबार सिरियाका प्रमुख शहरहरू कब्जा गर्दै राजधानीमा प्रवेश गरेपछि असद राजधानी छोड्न बाध्य भएका थिए। यस क्रममा कतिपयले असद चढेको विमान दुर्घटनामा परेको अफवाहसमेत फैलाएका थिए।

असदको लामो शासन र विद्रोह

बसर अल असद २४ वर्षसम्म सिरियाको सत्तामा रहेका थिए भने असद परिवारको शासन झण्डै ५० वर्षसम्म कायम रह्यो। सन् २०११ मा असदविरुद्ध सुरु भएको शान्तिपूर्ण प्रदर्शन गृहयुद्धमा परिणत भएपछि सिरियामा भयावह संकट उत्पन्न भयो।

यो युद्धले पाँच लाखभन्दा बढीको ज्यान लिएको छ भने १ करोड २० लाखभन्दा बढी व्यक्ति विस्थापित भएका छन्। तीमध्ये करिब ५० लाख शरणार्थी बन्न बाध्य भएका छन्।

स्थिति जटिल हुँदै

सिरियाको संकट अझै समाधान नजिक पुगेको छैन। असदको रूस पुग्नुलाई विभिन्न कोणबाट विश्लेषण गर्न थालिएको छ। यो घटनाले सिरियाली भविष्यलाई थप अन्योलतर्फ धकेल्न सक्छ।

असदलाई रूसले दिएको शरणबारे विभिन्न देशहरूले चासो व्यक्त गरेका छन्। थप जानकारी आउनेअपेक्षा गरिएको छ।

• Jigyasa media