काठमाडौँ, असोज १५ – भौतिक पूर्वाधार तथा यातायात मन्त्रालयले बाढी र पहिरोले क्षतिग्रस्त बनेका सडक र पुल मर्मत तथा सुधार गर्न २ अर्ब ५० करोड लागत लाग्ने जानकारी दिएको छ। मन्त्रालयका प्रेस संयोजक गोपाल झापालीका अनुसार, ती सडक तथा पुलहरूको मर्मतपछिको यातायात सञ्चालनका लागि यति ठूलो बजेट आवश्यक पर्नेछ।

मन्त्रालयको तथ्याङ्कअनुसार, अहिलेसम्म १४ वटा राजमार्ग र ४२ स्थानमा यातायात अवरुद्ध रहेको छ। प्रमुख प्रभावित राजमार्गहरूमा अरनिको, बिपी, कान्ति, पुष्पलाल मध्यपहाडी, मेची, मदन भण्डारी, र कालिगण्डकी कोरिडोर समावेश छन्।

सडकहरूको साथै, पाँच पुलमा पनि क्षति पुगेको छ। यसमा सिन्धुरेटार र फोक्सिङटारका सुनकोशी पुल, अरनिको राजमार्गको लिपिङ पुल, इलामको माइपोखरी सडकको राते खोला पुल, र लार्चा तथा हेवा खोलाका बेलिब्रिजहरू छन्।

मन्त्रालयले अहिलेसम्मको प्रयासले पृथ्वी राजमार्गको नौबिसे-मुग्लिङ खण्डमा अवरोध हटाई एकतर्फी यातायात सञ्चालन गर्न सफल भएको जानकारी दिएको छ। बाँकी क्षेत्रमा यातायात सुचारु गर्न थप सुधार र मर्मत कार्यलाई तीव्रता दिइँदैछ।

• Jigyasa media