काठमाडौं – वैदेशिक रोजगारको नाममा दुबई पठाइदिने भन्दै ठगी गर्ने धादिङ गंगाजमुना गाउँपालिका-४ का सन्जीव गुरुङ पक्राउ परेका छन्। हाल काठमाडौंको तार्केश्वर नगरपालिका-१०, मनमैजुमा बसोबास गर्दै आएका ३० वर्षीय गुरुङले तीन पीडितबाट कुल १९ लाख ७० हजार रुपैयाँ ठगी गरेको आरोपमा पक्राउ परेका हुन्।
काठमाडौं उपत्यका अपराध अनुसन्धान कार्यालय, टेकुको विशेष टोलीले पीडितहरूको उजुरीको आधारमा गुरुङलाई मनमैजु हिलेटोलबाट पक्राउ गरेको हो। उनले दुबईमा आकर्षक रोजगारीको प्रलोभन देखाएर नगद संकलन गरेको र त्यसपछि सम्पर्कविहीन भएको खुलेको छ।
गुरुङलाई थप अनुसन्धान र कानुनी कारबाहीका लागि वैदेशिक रोजगार विभाग, ताहाचल, काठमाडौंमा बुझाइएको छ। वैदेशिक रोजगारीमा जाने नेपालीलाई ठग्ने कार्यप्रति सरकारले कडा कदम चाल्ने प्रतिबद्धता जनाउँदै यस्तो आपराधिक गतिविधि नियन्त्रणमा लागि परेको जनाएको छ।
- Jigyasa media
