८ पुस, काठमाडौं। पश्चिम नेपालमा आजदेखि हिउँदे वर्षाको शुरुवात हुँदैछ। जल तथा मौसम विज्ञान विभागको मौसम पूर्वानुमान महाशाखाले आज रातिदेखि पश्चिम नेपालका पहाडी र हिमाली भेगमा वर्षा हुने जनाएको छ।
काठमाडौं र पोखरामा पनि छिटपुट वर्षाको सम्भावना रहेको महाशाखाले जानकारी दिएको छ। साथै, शुक्रबार अर्को वर्षा गराउने प्रणाली सक्रिय हुने भए पनि यसले मुख्यतः पश्चिम नेपाललाई मात्र प्रभावित गर्ने बताइएको छ।
तराई र उपत्यकाका केही स्थानमा हुस्सु र कुहिरो लागेकाले यातायातमा असर पर्न सक्ने भएकाले सावधानी अपनाउन महाशाखाले अनुरोध गरेको छ।
त्यस्तै, उच्च पहाडी र हिमाली क्षेत्रमा हिमपातको सम्भावना रहेकाले तापक्रममा गिरावट आउन सक्ने र जनजीवन प्रभावित हुन सक्ने चेतावनी दिइएको छ। जाडो बढ्न सक्ने भएकाले सतर्क रहन महाशाखाले सबैमा आग्रह गरेको छ।
कर्णाली र सुदूरपश्चिमका केही क्षेत्रमा मंगलबार पनि बदली रहँदै वर्षा र हिमपातको सम्भावनारहेको छ।
- Jigyasa media
