काठमाडौँ । अमेरिकी पूर्व राष्ट्रपति बाराक ओबामाले कमला ह्यारिसलाई राष्ट्रपति उम्मेदवारको रूपमा समर्थन गरेका छन्  ।

ओबामाले सामाजिक सञ्जालमा ह्यारिससँग टेलिफोन कुराकानी गरेको भिडियो सार्वजनिक गर्दै आफू र मिचेल ओबामाको ह्यारिसलाई राष्ट्रपतिको उम्मेदवारीमा पूर्ण समर्थन रहेको स्पष्ट गरेका छन्। 

ओबामाले नोभेम्बरमा हुने राष्ट्रपतीय निर्वाचनमा ह्यारिसले जित्ने विश्वास व्यक्त गरेका छन्। यस अघि जुलाई २१ मा राष्ट्रपति जो बाइडेन आफ्नो उम्मेदवारी फिर्ता लिएर ह्यारिसलाई राष्ट्रपतिको रूपमा समर्थन गरेपछि ओबामासहितका डेमोक्रेटिक नेताहरुले ह्यारिसलाई समर्थन गरेका थिए।

ओबामाको विगत

बाराक ओबामा २००८ मा अमेरिकी इतिहासमा पहिलो अफ्रिकी-अमेरिकी राष्ट्रपति निर्वाचित भएका थिए। उनले २०१२ मा पुनः निर्वाचित हुँदै दोस्रो कार्यकालको जिम्मेवारी लिए। ओबामाको कार्यकालमा स्वास्थ्य सेवा सुधार (Obamacare), आर्थिक सुधार, र अन्तर्राष्ट्रिय सम्बन्धमा नयाँ दृष्टिकोण ल्याउने प्रयासहरू भएका थिए। ओबामाले आफ्नो शासनकालमा पेरिस जलवायु सम्झौता, क्युबासँगको कूटनीतिक सम्बन्ध पुनर्स्थापना, र ईरानसँगको आणविक सम्झौता जस्ता प्रमुख कदमहरू चालेका थिए।

• Jigyasa media