काठमाण्डौ ।
दक्षिण कोरियाको मुआन अन्तर्राष्ट्रिय विमानस्थलमा आइतबार जेजु एयरको विमान दुर्घटना हुँदा मृत्यु हुनेको संख्या १२४ पुगेको छ। बीबीसीले जनाएको अनुसार विमानमा सवार २ जनाको भने जीवितै उद्धार गरिएको छ। दुर्घटनामा चालक दलका ६ सदस्य र १७५ यात्रु गरी १८१ जना सवार थिए।
अवतरणको क्रममा ल्यान्डिङ गियरमा समस्या
विमान बैंककबाट कोरियाको मुआन अन्तर्राष्ट्रिय विमानस्थलतर्फ आइरहेको थियो। अवतरणको क्रममा विमानको ल्यान्डिङ गियरमा समस्या देखिएपछि पाइलटले गियरबिना नै अवतरण गर्नुपरेको थियो। विमान धावनमार्गमा चिप्लिएर विमानस्थलको बारमा ठोक्किँदा दुर्घटना भएको हो।
दुर्घटना स्थानीय समयअनुसार बिहान ९:०७ बजे भएको हो। दुर्घटनापछि विमानस्थलमा हुने सबै स्थानीय तथा अन्तर्राष्ट्रिय उडानहरू स्थगित गरिएको छ।
पहिलो प्रयासमा असफल अवतरण
समाचार अनुसार विमानले दुई पटक अवतरण गर्ने प्रयास गरेको थियो। पहिलो प्रयासमा ल्यान्डिङ गियर नखुलेपछि विमानले विमानस्थलको परिक्रमा गरेको थियो। दोस्रो प्रयासमा पाइलटले गियरबिना नै विमान अवतरण गरेका थिए।
कतिपय मिडिया रिपोर्टहरूले चरा विमानको पखेटामा ठोक्किएको दाबी गरेका छन्। तर, दुर्घटनाको यकिन कारणबारे विस्तृत अनुसन्धान भइरहेको छ।
आगो निभाउन ४३ मिनेट लाग्यो
दुर्घटनापछि विमानमा आगो लागेको थियो। मुआन एयरपोर्टका फायर अफिसरका अनुसार आगो नियन्त्रणमा लिन ४३ मिनेट लागेको थियो। उद्धार कार्य जारी रहँदा धेरै यात्रु विमानको पछाडिको भागमा फसेका छन्।
अधिकांश मृतक दक्षिण कोरियाली नागरिक
विमानमा सवार यात्रुमध्ये १७३ जना दक्षिण कोरियाली र २ जना थाई नागरिक थिए। उद्धार टोलीले अझै जीवित यात्रुको खोजी गरिरहेको छ। दुर्घटनाले देशभर शोकको छायाँ छाएको छ।
दुर्घटनाको कारण र पाइलटको निर्णयबारे विस्तृत अनुसन्धान भइरहेको छ। विमानस्थलको सुरक्षामा सुधार गर्न र यस्ता दुर्घटनाको पुनरावृत्ति रोक्न आवश्यक कदम चाल्न सम्बन्धित निकायमाथि दबाब बढेको छ।
- Jigyasa media
