काठमाडौं ।इजरायली सेनाले गाजा सहरको पश्चिमी रिमाल क्षेत्रमा रहेको मुस्तफा हाफेज विद्यालयमा आक्रमण गरेको छ, जसमा कम्तीमा १२ जना प्यालेस्टाइनीको मृत्यु भएको छ। हमासद्वारा सञ्चालित रक्षा प्राधिकरणले यो आक्रमणको पुष्टि गरेको हो।
प्राधिकरणका प्रवक्ताका अनुसार, आक्रमणपछि उद्धारकर्मीहरूले भग्नावशेषमा पुरिएका थप व्यक्तिहरूको खोजी जारी राखेका छन्। इजरायली सेनाले हमासको कमान्डर र कन्ट्रोल सेन्टर विद्यालयभित्रै सञ्चालन भइरहेको आरोप लगाउँदै यसलाई निशाना बनाएको बताएको छ।
यसअघि पनि इजरायलले गाजा क्षेत्रमा रहेका अन्य विद्यालयहरूमा आक्रमण गरेको थियो। इजरायली सेनाले यी विद्यालयहरूलाई हमास लडाकुहरूको अड्डा बनेको आरोप लगाउँदै आएको छ। साथै, इजरायलले गाजापट्टी क्षेत्रबाट ६ जना बन्धकको शव फेला पारेको दाबी पनि गरेको छ। गत वर्ष अक्टोबर ७ मा हमासले इजरायलमा आक्रमण गरी झन्डै २५० जनालाई बन्दी बनाएको थियो।
- RSS
