बारा । जनकपुरधाम, भदौ २७ – बाराको निजगढ नगरपालिका–९ मा वाइफाइको रिचार्ज सकिएको विषयमा विवाद हुँदा एक व्यक्तिले श्रीमतीको हत्या गरेका छन् भने, दुई छोरी घाइते भएका छन्।
प्रहरीका अनुसार ४६ वर्षीय विमलकुमार बस्नेतले मादकपदार्थ सेवन गरेर ४० वर्षीया श्रीमती लक्ष्मी राईमाथि खुर्पा प्रहार गरेका थिए। घटनामा गम्भीर घाइते भएका उनकी जेठी छोरी १८ वर्षीया गंगा र १५ वर्षीया जमुनाको समेत उपचार भइरहेको छ। गंगालाई थप उपचारको लागि काठमाडौं पठाइएको छ।
जिल्ला प्रहरी कार्यालय बाराका प्रवक्ता डीएसपी प्रकाश सापकोटाका अनुसार चार दिनदेखि वाइफाइको रिचार्ज सकिएको विवादले खतरनाक मोड लिएको थियो। विमलकुमारले रक्सीमा पैसा हुने तर वाइफाइमा रिचार्ज गर्न नसक्ने भन्ने बहसका क्रममा खुर्पा प्रहार गरेका थिए।
प्रहरीले विमलकुमारलाई पक्राउ गरी घटनाबारे थप अनुसन्धान गरिरहेको छ।
- Jigyasa media
