भक्तपुर, कात्तिक २६ | भक्तपुरमा औषधि पसल (फार्मेसी) र ब्युटीपार्लर जस्ता व्यवसायहरू लागुऔषध कारोबारको ‘हब’ बन्ने खतरा देखिएको छ। जिल्ला प्रहरी परिसर भक्तपुरले फार्मेसी र ब्युटीपार्लरबाट लागुऔषध कारोबारीलाई पक्राउ गर्न थालेपछि यी स्थानहरूमा गोप्य सर्च अभियान र छापा मार्ने कार्य तीव्र भएको छ।
प्रहरी उपरीक्षक माधव बुढाथोकीका अनुसार, मानवीय स्वास्थ्य जोखिममा पार्ने गरी केही फार्मेसीहरूले स्वीकृत औषधिको आडमा अवैध लागुऔषध कारोबार गरिरहेका छन्। यस आर्थिक वर्षको कात्तिक महिनामा मात्र ५ घटनामा १० जनालाई लागुऔषध कारोबारको अभियोगमा पक्राउ गरिएको छ।
प्रहरी उपरीक्षक बुढाथोकीले भने, “अघिल्लो वर्ष कुनै पनि लागुऔषध कारोबारी पक्राउ नपरेको तथ्यांक देखेपछि शंका लाग्यो र अभियान सुरु गर्यौँ। अवस्था फरक पाएपछि लगातार पक्राउ गरिरहेका छौँ।”
गत शनिबार मध्यपुरथिमि–९ स्थित सुजु मेडिकलबाट अवैध लागुऔषध कारोबारमा संलग्न भएको आरोपमा संचालक गणेशप्रसाद आचार्यलाई पक्राउ गरिएको छ। त्यस्तै, मध्यपुरथिमि नगरपालिका–१ मा रहेको अर्को फार्मेसीका संचालक रोहित सिंह र बलिराम खड्कालाई समेत पक्राउ गरी अनुसन्धान थालिएको छ।
प्रहरीले भक्तपुरको सल्लाघारी क्षेत्रबाट अवैध लागुऔषधसहित दोलखाका सुशील कार्की र रामेछापका हिरे माझीलाई समेत पक्राउ गरेको छ।
प्रहरीले लागुऔषध कारोबार रोक्नका लागि फार्मेसीदेखि ब्युटीपार्लरसम्म गोप्य सर्च अभियान निरन्तर चलाइरहेको
जनाएको छ।
- RSS
