अर्घाखाँची, असोज १३ — अर्घाखाँचीको सन्धिखर्क–ढोरपाटन सडकखण्डअन्तर्गत सन्धिखर्क–९ टारीमा आज बिहान भएको जीप दुर्घटनामा दुई जनाको घटनास्थलमै मृत्यु भएको छ भने २४ जना घाइते भएका छन्।
जिल्ला प्रहरी कार्यालय अर्घाखाँचीका प्रमुख डिएसपी दिवस जिसीका अनुसार गुल्मीको पुर्कोटदह तर्फ गइरहेको लु १ ज ४७२३ नम्बरको फोर्स जीप दुर्घटनाग्रस्त भएको हो।
दुर्घटनामा गुल्मी मदाने गाउँपालिका–६ पुर्कोटकी १० वर्षीया अरुणा थापा र मदाने गाउँपालिका–७ नेटा खर्कका १३ वर्षीय नारायण पौडेलको मृत्यु भएको प्रहरीले पुष्टि गरेको छ।
यस दुर्घटनामा २४ जना घाइते भएका छन्। जसमध्ये ४ जनाको अवस्था गम्भीर रहेको छ। घाइतेहरूको प्रारम्भिक उपचार अर्घाखाँची अस्पतालमा भइरहेको छ भने अवस्था गम्भीर भएका केहीलाई थप उपचारका लागि बुटवल रेफर गरिएको प्रहरीले जनाएको छ।
स्थानीयवासी र प्रहरीको सहयोगमा घाइतेलाई उद्धार गरिएको थियो।
यसरी फेरि एकपटक सडक दुर्घटनाले दुई बालबालिकाको ज्यान लिएको घटनाले सडक सुरक्षा र जिम्मेवार यातायात प्रणालीप्रति गम्भीर प्रश्न उठाएको छ।
-
Jigyasanepal
