काठमाडौं, सिन्धुपाल्चोक र दाङमा गरी पाँच जनाको शव फेला परेको छ। ती घटनाबारे अनुसन्धान भइरहेको नेपाल प्रहरीले जानकारी दिएको छ।
काठमाडौंमा तीन शव भेटियो
काठमाडौंका गोकर्णेश्वर, टोखा र दक्षिणकाली नगरपालिकाका विभिन्न स्थानमा तीन जनाको शव फेला परेको छ।
गोकर्णेश्वर नगरपालिका-१ सुन्दरीजलस्थित निमा तामाङको घरको आँगनमा सोलुखुम्बु घर बताउने ५२ वर्षीय नरबहादुर राईको शव भेटिएको छ।
टोखा नगरपालिका-१० खरिबोटस्थित सत्कार खाजा पसल अगाडि सुनसरी धरान निवासी ५५ वर्षीय अर्जुनकुमार राई मृत अवस्थामा फेला परेका छन्।
दक्षिणकाली नगरपालिका-६ स्थित सांस्कृतिक क्षेत्र सुधार समितिको वन जंगलमा रहेको पानी ट्याङ्की नजिक एक अन्दाजी ६० वर्षीय पुरुषको शव फेला परेको छ। उनको परिचय खुलिनसकेको प्रहरीले जनाएको छ।
सिन्धुपाल्चोकमा एक वृद्धको शव
सिन्धुपाल्चोकको सुनकोशी गाउँपालिका-५ रतनकोटका ७० वर्षीय टीकाबहादुर विश्वकर्माको शव त्रिपुरासुन्दरी गाउँपालिका-३ तारकेनीस्थित हुन्दुङ खोल्साको किनारमा फेला परेको छ।
दाङमा पनि शव भेटियो
दाङको घोराही उपमहानगरपालिका-१२ डाँडागाउँका ५२ वर्षीय बुद्धिराम चौधरीको शव कुलोको छेउमा फेला परेको छ।
प्रहरीका अनुसार पाँच वटै घटनाबारे अनुसन्धान भइरहेको छ। शवको पहिचान, मृत्युको कारण र अन्य विषयमा विस्तृत जानकारी जुटाइँदैछ।
- Jigyasa media
