काठमाडौं - सूर्यदर्शन सहकारी प्रकरणमा अनियमितता गरेको आरोपमा पक्राउ परेका पूर्वगृहमन्त्री रवि लामिछानेको मोबाइल प्रहरीद्वारा फरेन्सिक परीक्षणका लागि डिजिटल फरेन्सिक ल्याब (डीएफएल) मा पठाइएको छ। कास्की जिल्ला प्रहरी कार्यालयले मोबाइलमा भएका डिलिटेड डेटा रिकभर गर्ने उद्देश्यले प्रहरी प्रधान कार्यालय, नक्सालमा रहेको फरेन्सिक ल्याबमा पठाएको हो।
प्रहरीका अनुसार यस परीक्षणले लामिछानेको मोबाइलबाट डिलिट गरिएका इमेलसहित अन्य विवरण पुन: प्राप्त गर्नेछ, जसले अनुसन्धानलाई थप सघाउने अपेक्षा गरिएको छ। कास्कीका एक प्रहरी अधिकृतले फरेन्सिक जाँच नियमित अनुसन्धान प्रक्रियामा रहेको भन्दै यसबाट नयाँ प्रमाण पत्ता लाग्न सक्ने बताएका छन्।
लामिछानेलाई सहकारी ठगी र संगठित अपराधको मुद्दामा थप अनुसन्धानका लागि अदालतले सात दिनको म्याद दिएको थियो। यो म्याद तिहार बिदासम्म लम्ब्याउने तयारी गरिँदैछ, र अदालत खुल्ने दिन लामिछानेलाई पुनः उपस्थित गराउने योजना छ। उनलाई २ कात्तिकमा काठमाडौंबाट पक्राउ गरी कास्की लगिएको थियो।
सूर्यदर्शन सहकारीमा बचतकर्ताको रकम दुरुपयोग गरिएको आरोपमा असोज १६ मा पूर्वअध्यक्ष जीबी राईसहित १९ जनाविरुद्ध कास्की अदालतमा मुद्दा दर्ता भएको थियो। पीडितहरूले लामिछानेसहित अन्य १८ जनाविरुद्ध माघ २२ मा पूरक जाहेरी दिएपछि छानबिन अघि बढाइएको हो। संसदीय छानबिन समितिको सिफारिसपछि लामिछानेलाई कानूनी कारबाही सुरु गरिएको हो।
- Jigyasa media
