काठमाडौँ - फतुवा-बिजयपुर नगरपालिका वडा नं ११, वृद्धा–राङी गाउँमा जङ्गली हात्तीको आक्रमणमा परी ७० वर्षीया पातली तामाङको मृत्यु भएको छ। इलाका प्रहरी कार्यालय बिजयपुरका निरीक्षक इन्द्रमणि अधिकारीका अनुसार पातली आफ्नै घरमा सुतिरहेका बेला बिहान अचानक हात्तीले आक्रमण गर्दा उनको घटनास्थलमै मृत्यु भएको हो।
प्रहरीका अनुसार पातलीका श्रीमान्ले भने भागेर आफ्नो ज्यान जोगाउन सफल भए। आक्रमणका कारण घर पूर्ण रूपमा क्षति भएको छ भने छेउको अर्को घरलाई समेत क्षति पुगेको छ।
घटनाको खबर प्राप्त हुनासाथ नेपाल प्रहरी, डिभिजन बन कार्यालय, र सशस्त्र प्रहरीको टोली घटनास्थलमा पुगेको थियो। प्रहरीले घटनाबारे स्थानीयसँग सोधपुछ गर्दै थप अनुसन्धान अघि बढाएको जनाएको छ।
- Jigyasa media
