अर्घाखाँची — भूमिकास्थान नगरपालिकामा तिहारको देउसी खेलिरहेको समूहलाई बसले ठक्कर दिँदा दुःखद घटना भएको छ। दुर्घटनामा २२ वर्षीया तारा श्रेष्ठसहित दुई जनाको मृत्यु भएको छ भने ३० भन्दा बढी घाइते भएका छन्।

अर्घाखाँचीको भूमिकास्थान नगरपालिका–५ र ६ को सिमानामा रहेको जयठाटीमा आज साँझ करीब ५ बजे ना ३ ख २४७१ नम्बरको बसको ब्रेक फेल हुँदा देउसी खेलिरहेका मानिसहरूलाई ठक्कर दिएको हो। जिल्ला प्रहरी कार्यालयका प्रमुख डीएसपी चक्रबहादुर मल्लका अनुसार बसको ब्रेक फेल भएपछि यो दुर्घटना भएको हो।

घटनास्थलमै एक महिलाको मृत्यु भएको र उपचारका क्रममा तारा श्रेष्ठको ज्यान गएको डीएसपी मल्लले जानकारी दिएका छन्। घाइतेहरूको अर्घाखाँची अस्पतालमा उपचार भइरहेको छ भने स्थानीय र प्रहरीको सहयोगमा घटनास्थलमा उद्धार कार्य गरिएको छ।

स्थानीयवासी गणेश प्रसाद भण्डारीले जयठाटी क्षेत्रमा हरेक वर्ष तिहारमा विभिन्न टिमहरूले भैलो खेल्ने परम्परा रहेको बताएका छन्। घटनाको थप अनुसन्धान भइरहेको छ।

• Jigyasa media