सर्लाही, पुष १७ – बलरा नगरपालिका–९ छतौनामा बस दुर्घटनामा परेर सशस्त्र प्रहरी निरीक्षक विजय तुलाधरको मृत्यु भएको छ। सशस्त्र प्रहरी बोर्डर आउट पोस्ट बलराका इन्चार्ज रहेका तुलाधर बा ००६ ख २००४ नम्बरको बसले च्यापिँदा गम्भीर घाइते भएका थिए।
मंगलबार राति करिब ९ बजे अत्यधिक गतिमा रहेको बसले चेकपोस्टमा राखिएको ड्रमलाई ठक्कर दिँदै पल्टिएको थियो। बस पल्टिएपछि प्रहरी निरीक्षक तुलाधर च्यापिएका थिए।
घाइते तुलाधरलाई तत्काल उपचारका लागि प्रादेशिक अस्पताल मलंगवा लगिएको थियो। तर, उपचारकै क्रममा उनको मृत्यु भएको प्रहरीले जनाएको छ।
जिल्ला प्रहरी कार्यालय सर्लाहीका अनुसार दुर्घटनापछि बसका चालकसहित तीन जनालाई नियन्त्रणमा लिइएको छ। घटनाबारे थप अनुसन्धान भइरहेको जनाइएको छ।
- Jigyasa media
