काठमाण्डौ ।
साउन ३२ गते सोलुखुम्बुको थामे गाउँमा अचानक आएको लेदोसहितको बाढीले क्षणभरमै गाउँलाई बगरमा परिणत गरिदियो। यो घटनाले जलवायु परिवर्तनका कारण उत्पन्न हुने खतराहरुमा स्थानीयबासीको सजगता अझै बढाएको छ। खुम्बु पासाङल्हामु गाउँपालिकाकी अध्यक्ष टासी ल्हामु शेर्पाले “जलवायुजन्य जोखिमको चपेटामा छन् यहाँका बासिन्दा," भनेर चिन्ता व्यक्त गरेकी छिन्।
पछिल्ला वर्षहरुमा, मनसुन र असामयिक भारी वर्षाका कारण देशभर जलवायुजन्य विपद्को वृद्धि भएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणले यस वर्षकै मात्र, मनसुनजन्य घटनाहरुमा चार सय ९५ जनाको ज्यान गएको जानकारी दिएको छ। वर्षाले धान उत्पादनमा पनि ठूलो असर गरेको छ, जसले नेपालको कृषि क्षेत्रमा जोखिमलाई उजागर गरेको छ।
अहिले जलवायु परिवर्तनको असर न्यूनीकरणका लागि नेपालले अन्तर्राष्ट्रिय स्तरमा आवाज उठाउने तयारी गरेको छ। आजदेखि अजरबैजानको बाकुमा सुरु भएको जलवायु परिवर्तनसम्बन्धी संयुक्त राष्ट्रसंघीय सम्मेलन (कोप–२९) मा राष्ट्रपति रामचन्द्र पौडेलले नेपालको तर्फबाट हिमाल र पृथ्वीको सुरक्षाका लागि अन्तर्राष्ट्रिय सहयोगको माग गर्दै नेपाली प्रतिनिधिहरु सहभागी छन्।
प्राकृतिक विपद्बाट हुने आर्थिक र मानवीय क्षति न्यूनीकरण गर्न नेपालले जलवायु वित्तमा अन्तर्राष्ट्रिय सहयोगको आवश्यकता भएको बताएको छ। जल तथा मौसम विज्ञान विभागले मुलुकमा ४७ ठूला हिमताल उच्च जोखिममा रहेको जनाएको छ, जसले हिमाल पग्लिएर खर्बौंको क्षति निम्त्याउन सक्ने खतरा रहेको संकेत गरेको छ।
नेपालले यस वर्षको कोपमा मुख्यतया जलवायु वित्त, जलवायुजन्य हानी–नोक्सानीको क्षतिपूर्ति, र कार्बन व्यापारमा जोड दिनुका साथै पर्वतीय सुरक्षा, जलवायु अनुकूलन, र प्रविधि हस्तान्तरणमा पनि प्राथमिकता राखेको छ।
जलवायुजन्य असरका उदाहरण र नेपालजस्ता हिमाली मुलुकमा जलवायुसँग जुध्नका लागि अन्तर्राष्ट्रिय सहयोगका लागि यसपटक नेपालले विश्व समुदायलाई थप दबाब दिने योजनासमेत बनाएको छ।
- RSS
