बागलुङ: निसीखोला गाउँपालिका-३, किटनीमा शुक्रबार राति चट्याङ लागेर २४ वर्षीया रजना बुढाको मृत्यु भएको छ। आफ्नो घरभित्र बसिरहेको बेला चट्याङ पर्दा उनको घटनास्थलमै मृत्यु भएको जिल्ला प्रहरी कार्यालय बागलुङले जानकारी दिएको छ।
प्रहरी नायब उपरीक्षक विजय यादवका अनुसार, राति १ बजे स्थानीयले इलाका प्रहरी कार्यालय झिवाखोलामा चट्याङ लागेको सूचना दिएपछि तत्कालै प्रहरी टोली उद्धारका लागि घटनास्थल पुगेको थियो। उद्धारमा प्रहरी वरिष्ठ हवल्दार केशव बुढाथोकीको नेतृत्वमा दुई जना खटिएका थिए।
थप अनुसन्धानका लागि इलाका प्रहरी कार्यालय बुर्तिबाङबाट प्रहरी निरीक्षक आनन्द बस्नेतको कमाण्डमा सात जनाको टोली खटाइएको छ। मृतक बुढाको शव परीक्षणका लागि बुर्तिबाङ प्राथमिक स्वास्थ्य केन्द्रमा ल्याउने तयारी भइरहेको छ।
प्राकृतिक विपत्तिका कारण भएको यस दुःखद घटनाले स्थानीयवासीलाई स्तब्ध बनाएको छ।
- Jigyasa media
