नयाँ दिल्ली। पूर्वी भारतीय राज्य ओडिसा र पश्चिम बंगालमा शुक्रबार चक्रवात 'दाना'को कारणले भारी वर्षा भएको छ, जसले तटीय क्षेत्रका जनजीवनमा असर पारेको छ। भारतीय अधिकारीहरूका अनुसार चक्रवातले बिहीबार मध्यरातमा ओडिसाको केन्द्रपारा र भद्रकका बीचको क्षेत्रमा अवतरण गर्यो।
अवतरणको क्रममा लगभग १००–११० किलोमिटर प्रतिघण्टाको गति रहेको चक्रवातले विभिन्न ठाउँमा रूख ढलाउनुका साथै विद्युत् लाइनहरूमा क्षति पुर्याएको छ। यसले स्थानीय यातायात र आवश्यक सेवामा अवरोध सिर्जना गरेको जनाइएको छ। चक्रवातले खेतबारीमा पनि व्यापक क्षति पुर्याएको बताइएको छ, तर अहिलेसम्म कुनै हताहतको सूचना आएको छैन।
भारतीय मौसम विज्ञान विभागका अनुसार चक्रवात 'दाना' अब उत्तर–पश्चिम दिशामा कमजोर हुँदै अगाडि बढ्नेछ। अवतरणपछि अब यो चक्रवात क्रमशः कमजोर बन्दै जाने बताइएको छ।
चक्रवातको असरलाई ध्यानमा राख्दै भुवनेश्वर र कोलकातामा हवाई तथा रेल सेवा केही समयका लागि स्थगित गरिएको थियो, जुन पुनः शुक्रवार बिहानदेखि सञ्चालनमा आएको छ।
यस विपत्तिबाट प्रभावित क्षेत्रका करिब दश लाख नागरिकलाई सुरक्षित स्थानमा सारिएको छ। साथै, विद्यालयहरू पनि बन्द गरिएको छ। विपद् व्यवस्थापनको लागि स्थानीय निकायहरूले प्रहरी, चिकित्सा टोली, र राष्ट्रिय विपद् प्रतिक्रिया बलका टोलीहरूलाई तैनाथ गरेका छन्।
(स्रोत: रासस, सिन्ह्वा)
- Jigyasa media
