काठमाडौँ, २७ कार्तिक २०८१ – कतार एयरवेजले आजदेखि भैरहवास्थित गौतमबुद्ध अन्तर्राष्ट्रिय विमानस्थलबाट नियमित दैनिक उडान सुरु गरेको छ। नेपाल नागरिक उड्डयन प्राधिकरणका अनुसार यस उडानले नेपाली हवाई क्षेत्रको अन्तर्राष्ट्रिय उडान सञ्जाललाई अझै बलियो बनाउने अपेक्षा गरिएको छ।

प्राधिकरणका सूचनाअधिकारी ज्ञानेन्द्र भूलले कतार एयरवेजको यो उडानलाई नेपालको अन्तर्राष्ट्रिय विमानस्थललाई विश्वव्यापी समुदायले थप मान्यता दिएको संकेतको रूपमा लिएका छन्। उनले यो उडानले नेपालको हवाई क्षेत्रलाई अन्तर्राष्ट्रिय स्तरमा थप पहुँच दिने र गौतमबुद्ध विमानस्थल र आसपासका क्षेत्रहरूको आर्थिक सम्भावना वृद्धि गर्ने विश्वास व्यक्त गरे।

हवाई भाडामा प्रतिस्पर्धात्मक सुधारको अपेक्षा

कतार एयरवेजको यस नियमित उडानले हवाई भाडा नियन्त्रणमा समेत सहयोग गर्ने अपेक्षा गरिएको छ। प्राधिकरणका अनुसार, प्रतिस्पर्धात्मक ‘एयरफेयर सिस्टम’ को विकाससँगै स्वदेशी वायुसेवा कम्पनीहरूलाई प्रतिस्पर्धा गर्न सहज हुनेछ। यसले नेपाली यात्रुहरूलाई उचित हवाई भाडामा सेवासुविधा लिन मद्दत पुग्नेछ।

सरकारद्वारा विमानस्थल सहुलियत प्याकेज घोषणा

सरकारले अन्तर्राष्ट्रिय विमानस्थलहरूलाई प्रोत्साहन गर्न सहुलियत प्याकेज घोषणा गरेको छ, जसबाट एयरलाइन्सहरूले नयाँ विमानस्थलहरूबाट व्यावसायिक उडान सञ्चालनमा थप रुचि राख्नेछन्। कतार एयरवेजले गौतमबुद्ध अन्तर्राष्ट्रिय विमानस्थललाई ‘रिकनाइज’ गर्नु रणनीतिक दृष्टिले महत्त्वपूर्ण मानिएको छ। यसले भविष्यमा अन्तर्राष्ट्रिय विमानस्थलको पूर्ण क्षमतामा सञ्चालनका लागि नयाँ आधार तयार गर्ने अपेक्षा गरिएको छ।

उडान तालिका र अन्य सेवाहरू

कतार एयरवेजले काठमाडौँमा दैनिक दुई र भैरहवामा दैनिक एक उडान गर्नेछ। आगामी ३० नोभेम्बरसम्म भैरहवामा दैनिक एक उडान तालिका निर्धारण गरिएको छ। गौतमबुद्ध अन्तर्राष्ट्रिय विमानस्थलमा अहिले नेपाल एयरलाइन्स, जजीरा एयर, फ्लाइ दुबई, र थाई एयर एसियाका उडानहरू समेत नियमितरूपमा भइरहेको छ।

त्रिभुवन अन्तर्राष्ट्रिय विमानस्थलको स्तरोन्नति कार्य जारी

त्रिभुवन अन्तर्राष्ट्रिय विमानस्थल (टीआइए) मा स्तरोन्नतिको काम तीव्र गतिमा अघि बढाइएको छ। धावनमार्गसँगै समानान्तर ट्याक्सी वे निर्माणको काम समेत राति १० बजेदेखि बिहान ८ बजेसम्म भइरहेको छ। प्राधिकरणले दैनिक १० घण्टा उडान बन्द गरेर विमानस्थलको मर्मत र विस्तारको कामलाई प्राथमिकता दिएको छ।

नेपालको हवाई क्षेत्रलाई अझ प्रभावकारी र प्रतिस्पर्धी बनाउनका लागि विभिन्न योजना र परियोजनाहरूको कार्यान्वयन भइरहेको यस अवस्थामा कतार एयरवेजको भैरहवा उडानले थप योगदान पुर्याउने विश्वास लिइएको छ।

• Jigyasa media