काठमाडौँ — दक्षिणपूर्वी स्पेनमा आएको भीषण बाढीका कारण मृत्यु हुनेको संख्या २ सयभन्दा बढी पुगेको छ। असिनासहितको भारी वर्षाले मंगलबार भ्यालेन्सिया नजिकैको चिभा सहरलाई नराम्ररी प्रभावित बनाएको थियो, जहाँ वर्षभरि पर्ने पानी केवल आठ घण्टाभित्रै खसेको थियो।

स्थानीय अधिकारीहरूका अनुसार मृत्युको संख्या अझै बढ्न सक्ने सम्भावना छ भने कैयौं मानिस अझै बेपत्ता छन्। बाढीले सडक, रेल मार्ग, र पुलहरू भत्काइदिएको छ, जसका कारण यातायात सेवा पूर्ण रूपमा अवरुद्ध भएको छ। सडकहरूमा बाढीले बगाएका सवारीसाधनको थुप्रो छ, र प्रभावित क्षेत्रमा पानीले ठुलो क्षति पुर्याएको छ।

भिडियोहरूमा केही मानिसहरूलाई रूखहरूले जोगाएको दृश्य पनि देखिन्छ। भारी वर्षाले देशका अधिकांश क्षेत्रलाई प्रभावित पार्नाका साथै उडान र अन्य यातायात सेवा पनि अवरुद्ध भएको छ।

बेलेरिक टापुमा समेत व्यापक क्षति भएको र केही मानिसको हताहत भएको स्थानीय सञ्चारमाध्यमहरूले जनाएका छन्। मौसमविद्हरूले आगामी दिनमा पनि थप वर्षा हुने चेतावनी दिएका छन्, जसले गर्दा स्थिति अझ गम्भीर हुन सक्ने बताइएको छ।

स्पेनको यो प्राकृतिक विपत्तिमा उद्धार कार्य जारी रहेको छ, र स्थानीय सरकार र उद्धारकर्मीहरू प्रभावित क्षेत्रलाई सहायताको लागि जुटिरहेका छन्।

• RSS