तनहुँ, २३ कार्तिक – तनहुँको भानु नगरपालिका–८ गैरीफाँटमा घरेलु विवादले उग्र रूप लिएपछि ४२ वर्षीय ओमनारायण श्रेष्ठले आफ्नै श्रीमती ३९ वर्षीया प्रतिक्षा श्रेष्ठको बन्चरो प्रहार गरी हत्या गरेका छन्।
प्रहरीका अनुसार बिहीबार साँझ भएको यो घटनामा गम्भीर घाइते भएकी प्रतिक्षालाई दमौली अस्पताल पुर्याइएको थियो, तर उपचारका क्रममा चिकित्सकहरूले उनलाई मृत घोषित गरे। जिल्ला प्रहरी कार्यालय तनहुँका प्रहरी नायब उपरीक्षक अशोक थापाले घटनामा संलग्न ओमनारायणलाई नियन्त्रणमा लिइएको जानकारी दिएका छन्।
प्रारम्भिक अनुसन्धानले घरेलु विवादका कारण यो दु:खद घटना भएको संकेत गरेको छ। हाल घटनाको थप अनुसन्धान भइरहेको छ।
- Jigyasa media
