पर्सा, भदौ २३ - पर्साको जगरनाथपुर गाउँपालिका-५, मसिहानी टोल नजिकैको गंगोल नदीमा नुहाउने क्रममा दुई बालकको डुबेर मृत्यु भएको छ। ऋषिपञ्चमीका दिन आमासँगै नदीमा नुहाउन गएका भारत बिहारका दुई बालकको निधन भएको हो।
मृत्यु हुनेहरूमा बिहारको बेनिया बनकटवाका १० वर्षीय गुलशन ठाकुर हजाम र सिक्टाका ८ वर्षीय अभिषेक पटेल रहेका छन्। दुवै बालक जगरनाथपुर-५ मसिहानीस्थित मावलीघरमा बस्दै आएका थिए।
आइतबार अपराह्न ४ बजे, गाउँका महिलाहरू ऋषिपञ्चमीका अवसरमा गंगोल नदीमा नुहाउन गएका बेला ती दुई बालक पनि आमासँगै नदीमा गएका थिए। महिलाहरू नुहाइरहेका बेला ती बालकहरू पनि नुहाउन नदीमा पसेका थिए, जसको क्रममा उनीहरू डुबेर बेहोस भए। जिल्ला प्रहरी कार्यालय पर्साका प्रवक्ता प्रहरी नायब उपरीक्षक दीपक भारतीका अनुसार दुवै बालकको डुबेर मृत्यु भएको हो।
दुवै बालकको शव पोस्टमार्टमका लागि वीरगन्जस्थित नारायणी अस्पताल पठाइएको प्रहरीले जनाएको छ।
- Jigyasa media
