म्याग्दी, कात्तिक ३ - अन्नपूर्ण प्रथम हिमालको आधार शिविर क्षेत्रमा दशैंपछिको बिदामा आन्तरिक पर्यटकहरूको चहलपहल बढेको छ।

दशैंको टीकापछि पाँच दिनमा आठ सयभन्दा बढी आन्तरिक पर्यटक आधार शिविर पुगेको अभियन्ता तेजबहादुर गुरुङले जानकारी दिए। अन्नपूर्ण गाउँपालिका–४ नारच्याङस्थित हुमखोलाबाट पदमार्ग हुँदै दुई दिनको पैदल यात्रापछि अन्नपूर्ण आधार शिविर पुग्न सकिन्छ।

यस क्षेत्रमा पदमार्गका लागि पर्यटकीय पूर्वाधार निर्माणसँगै पञ्चकुण्ड ताल, फुतफुते ताल, गुफा, र झरनाजस्ता प्राकृतिक दृश्यहरूले पर्यटकलाई आकर्षित गर्दै चहलपहल बढाएको हो।

गत वर्षको तुलनामा यस वर्ष पर्यटकहरूको सङ्ख्यामा छ गुणाले वृद्धि भएको स्थानीय होटल व्यवसायीहरू बताउँछन्। भारतीय, चिनियाँ, ताइवानी र इटालियन पर्यटकहरूको आगमनले स्थानीय व्यवसायमा पनि सकारात्मक प्रभाव परेको छ।

तर, पर्यटकको बढ्दो सङ्ख्याले आधार शिविरमा फोहोर व्यवस्थापन र शौचालयजस्ता सुविधाहरूको अभाव रहेको गुनासो पनि आएको छ।

अन्नपूर्ण गाउँपालिकाको केन्द्र पोखरेबगरबाट २२ किलोमिटर गाडीमा यात्रा गरी हुमखोला पुग्न सकिन्छ, जहाँबाट २१ किलोमिटरको पैदलयात्रा गर्दै आधार शिविरमा पुगिन्छ।

• Jigyasa media