काठमाडौं - कृषि सामग्री कम्पनी लिमिटेडले सिंगापुरको आदित्य बिरला ग्लोबल ट्रेडिङ प्रालिलाई २५ हजार टन डीएपी मल आपूर्ति गर्ने ठेक्का दिएको छ। करिब २ अर्ब ५६ करोड रुपैयाँ (१ करोड ८९ लाख ७५ हजार अमेरिकी डलर) मा मल आपूर्ति गर्न यो सम्झौता भएको हो, जसमा वीरगञ्ज, विराटनगर, र भैरहवामा प्रतिटन ७५९ डलरमा मल आपूर्ति हुनेछ।

पछिल्लो समय नेपालमा मलको लगातार अभाव देखिँदै आएको छ। यस वर्ष मल अभाव हुन नदिन सरकारी पहल अन्तर्गत हरेक महिना जसो ग्लोबल टेन्डरमार्फत मल खरिद गरिँदै आएको कृषि सामग्री कम्पनीका सूचना अधिकारी पुन्यप्रसाद उपाध्यायले जनाएका छन्।

कृषि मन्त्रालयका अनुसार चालू आर्थिक वर्ष २०८१/८२ को सुरुवातदेखि असोज मसान्तसम्ममा १ लाख ५५ हजार ६८९ टन मल आयात भइसकेको छ। गत वर्षको मौज्दातलाई जोड्दा हाल भण्डारणमा १ लाख ४४ हजार ८२५ टन मल रहेको छ।

सरकारले यो वर्ष ५ लाख ५० हजार टन रासायनिक मल आयात गर्ने लक्ष्य राखेको छ। गत वर्ष देखिएको मलको अभावले कृषकहरूलाई समस्यामा पारेको हुँदा यस पटक समयमै आपूर्ति व्यवस्था मिलाउन सरकारले ठेक्का प्रक्रियालाई तीव्रता दिएको हो।

• Jigyasa media