काठमाडौं, असार १४ — नेपाली साहित्यमा समीक्षा विधालाई मजबुत बनाउँदै आएका साहित्यकार तथा पत्रकार जयदेव गौतमको समीक्षा सङ्ग्रह ‘किताबको अँगालोमा’ सार्वजनिक गरिएको छ। नेपाल स्रष्टा समाज केन्द्रीय समितिको आयोजनामा राजधानीमा सम्पन्न एक भव्य समारोहमा कृतिको लोकार्पण गरिएको हो।

कार्यक्रममा प्रमुख अतिथि प्रा.डा. गोविन्दराज भट्टराई, श्रीओम श्रेष्ठ 'रोदन', वरिष्ठ समालोचक प्रमोद प्रधान, डा. गीता त्रिपाठी लगायत स्रष्टाहरूले संयुक्त रूपमा पुस्तक विमोचन गरे।

"नेपाली भाषामाथि सावधानी जरुरी छ" — प्रा.डा. भट्टराई

प्रमुख अतिथि प्रा.डा. भट्टराईले नेपाली भाषा र साहित्यलाई बिगार्ने प्रवृत्तिबाट सावधान रहन आग्रह गर्दै, विदेशमा रहेर पनि साहित्यमा सक्रिय गौतमको योगदानलाई विशेष प्रशंसा गरे। “स्वास्थ्य प्रतिकूलताका बाबजुद पनि निरन्तर लेखनमा लाग्नु प्रेरणादायी छ,” उनले भने ।

“गौतमको कलम आलोचना गर्न नहच्किने साहसी स्वर हो” — प्रमोद प्रधान

वरिष्ठ समालोचक प्रमोद प्रधानले ‘ किताब अँगालोमा’ पुस्तकको प्रशंसा गर्दै भने, “नेपाली साहित्यमा अहिले कृति-केन्द्रित समीक्षाहरू विरलै पाइन्छन्। तर गौतमले समीक्षामा केवल प्रशंसा होइन, कमजोरीका पाटाहरूलाई पनि स्पष्ट रूपमा उठाएका छन्।”

उनले गौतमको कृति छनोटमा सन्तुलन, आलोचनात्मक दृष्टिकोण र पुराना कृतिप्रति समेत समर्पण रहेको उल्लेख गरे।

“शारीरिक अवस्था जेसुकै भए पनि बौद्धिक चेतनामा उचाइ” — डा. गीता त्रिपाठी

समालोचक डा. गीता त्रिपाठीले गौतमलाई ‘ओझेल परेर पनि ओझेल नपरेका व्यक्तित्व’ को संज्ञा दिँदै भनिन्, “शारीरिक अस्वस्थताको बाबजुद ४२ वटा आलेख समेटिएको यस्तो सशक्त कृति दिनु सजिलो होइन।”

उनले पुस्तकलाई बौद्धिक, तथ्यपरक र अनुसन्धानमूलक समीक्षा संग्रह भएको उल्लेख गर्दै, "लेखकहरूलाई सजग बनाउने चेतपूर्ण लेखहरू यसमा समेटिएका छन्," भनिन्।

“अशक्त भएर चुप लाग्दैनन् जयदेव” — श्रीओम श्रेष्ठ 'रोदन'

नेपाल स्रष्टा समाजका अध्यक्ष **श्रीओम श्रेष्ठ ‘रोदन’**ले कार्यक्रमको अध्यक्षता गर्दै भने, “विदेश र प्रतिकूल स्वास्थ्य अवस्थाबीच पनि गौतमले हामीले पढ्न नसकेका पुस्तकहरू समेत अध्ययन गरी निर्भीकताका साथ समीक्षा लेखिरहेका छन्। उनी अशक्त भएर चुप लाग्ने स्रष्टा होइनन्।”

गौतमको आवाज अमेरिकाबाट

अमेरिकाको भर्जिनियामा बसोबास गरिरहेका जयदेव गौतमको लेखिएको मन्तव्य उनका मित्र विजय थापाले वाचन गरे। मन्तव्यमा उनले स्वास्थ्य कारणले उपस्थित हुन नसकेको दुःख व्यक्त गर्दै भने, “विकसित देशहरूमा समीक्षा विधा अत्यन्त सम्मानित छ। आशा छ, नेपालमा पनि समीक्षा साहित्यले आवश्यक सम्मान पाउनेछ।”

प्रकाशन र व्यवस्थापन

कार्यक्रममा स्वागत मन्तव्य शंकर भारतीले दिएका थिए भने सञ्चालन समाजका सचिव प्रकाश घायलले गरेका थिए।

कृति ‘किताब अँगालोमा’ लाई सुन्दर स्वदेश पब्लिकेशनले प्रकाशनमा ल्याएको हो।

• Jigyasanepal