काठमाडौं, मंसिर २ – नेपाली फुटबल टिमले १३ वर्षपछि अफगानिस्तानमाथि ऐतिहासिक विजय हासिल गर्दै प्रशंसनीय प्रदर्शन गरेको छ। ताजिकिस्तानको डुसानवेस्थित सेन्ट्रल रिपब्लिकन स्टेडियममा शनिबार भएको मैत्रीपूर्ण खेलमा नेपालले अफगानिस्तानलाई २-० गोल अन्तरले हराएको हो।
नेपालका लागि जिलेस्पीजंग कार्की र रोहित चन्दले समान एक–एक गोल गर्दै टिमलाई जित दिलाए। दुवै गोल दोस्रो हाफमा सम्भव भएको थियो। जिलेस्पीले दोस्रो हाफको सुरुवातमै गोल गर्दै नेपाललाई अग्रता दिलाए भने रोहितले ७८औं मिनेटमा गोल थप्दै जितलाई मजबुत बनाए।
रोहित चन्दले यो खेलमार्फत नेपाली टिमका लागि आफ्नो करियरकै पहिलो गोल गरेका छन्। १५ वर्षअघि राष्ट्रिय टिममा डेब्यू गरेका उनले अन्ततः यो महत्त्वपूर्ण क्षण अनुभव गर्न सफल भएका हुन्।
विगतको संघर्षलाई तोड्दै शानदार जित
नेपालले यसअघि २०११ मा दशरथ रंगशालामा भएको एएफसी च्यालेन्ज कप छनोटमा अफगानिस्तानलाई १-० ले पराजित गरेको थियो। त्यो खेलमा भरत खवासले निर्णायक गोल गरेका थिए।
यो जितसँगै नेपालले पुरुष फुटबलमा एक वर्षपछि पहिलो जित हात पारेको छ। फिफा विश्वकप र एएफसी एसियन कप छनोट अन्तर्गत २०२३ अक्टोबरमा लाओसविरुद्धको जितपछि सात खेलसम्म नेपाल जितविहीन रहेको थियो।
नेपालले अहिलेको खेलले आफ्नो आत्मविश्वास पुनः कायम गरेको र आगामी खेलका लागि सकारात्मक संकेत देखाएको छ। नेपाली फुटबलप्रेमीहरूका लागि यो जितले उत्साह र आशाको किरण थपिदिएको छ।
- Jigyasa media
