चैत२१, काठमाडौं । जस बट्लरको अविजित अर्धशतकको मद्दतले गुजरात टाइटान्सले इन्डियन प्रिमियर लिग (आईपीएल) मा दोस्रो जित दर्ता गरेको छ। बुधबार सम्पन्न खेलमा रोयल च्यालेन्जर्स बेंगलुरुलाई ८ विकेटले पराजित गर्दै गुजरातले महत्त्वपूर्ण दुई अंक हासिल गर्यो।
बेंगलुरुले प्रस्तुत गरेको १७० रनको लक्ष्य गुजरातले १७.५ ओभरमै मात्र २ विकेट गुमाएर पूरा गर्यो। बट्लरले विस्फोटक प्रदर्शन गर्दै ३९ बलमा ७३ रन बनाए, जसमा ५ चौका र ६ छक्का सामेल थिए। त्यस्तै, साइ सुदर्शनले ४९ रन योगदान दिए भने शेरफन रदरफोर्ड ३० रनमा अविजित रहे। कप्तान शुभमन गिलले १४ रन बनाए।
बेंगलुरुका बलर जोश हेजलवूड र भुवनेश्वर कुमारले समान १-१ विकेट लिए।
पहिले ब्याटिङ गरेको बेंगलुरुले २० ओभरमा ७ विकेट गुमाएर १६९ रन बनाएको थियो। टोलीका लागि लियाम लिभिङस्टनले ५४ रनको महत्वपूर्ण योगदान दिए भने जितेश शर्माले ३३ र टिम डेभिडले अविजित ३२ रन बनाए।
गुजरातका बलर मोहम्मद सिराजले उत्कृष्ट प्रदर्शन गर्दै ४ ओभरमा १९ रन खर्चेर ३ विकेट लिए। साइ किशोरले ४ ओभरमा २२ रन दिँदै २ विकेट लिए भने इशान्त शर्मा, प्रसिध कृष्णा र अर्शद खानले समान १-१ विकेट हात पारे।
यस जितसँगै गुजरातले तीन खेलबाट ४ अंक जोड्दै चौथो स्थान सुरक्षित गरेको छ, जबकि समान खेल खेलेको बेंगलुरु शीर्षस्थानबाट तेस्रो स्थानमा झरेको छ।
- Jigyasa media
