काठमाडौँ – चाइनिज ताइपेइमा भइरहेको एएफसी यु-२० एसियन कप छनोट प्रतियोगितामा आज नेपालले बहराइनसँग प्रतिस्पर्धा गर्दैछ। समूह बी अन्तर्गत हुने यो खेल नेपाली समय अनुसार दिउँसो पौने १ बजे न्यु ताइपेइ सिटीस्थित फु जेन क्याथोलिक युनिभर्सिटी स्टेडियममा सुरु हुनेछ।
नेपालले यसअघि तीन खेलमध्ये एक खेलमा मात्र जित हात पारेको छ भने दुई खेलमा पराजित भएको छ। पाँच टोली सहभागी समूह बी मा नेपाल तीन अंकसहित चौथो स्थानमा रहेको छ, जबकि बहराइनले समान तीन अंकका साथ तेस्रो स्थानमा स्थान बनाएको छ।
समूहको शीर्ष स्थानमा रहेको उज्वेकिस्तानले दुवै खेल जितेर ६ अंक प्राप्त गरेको छ भने कम्बोडिया पनि तीन खेलबाट ६ अंकसहित दोस्रो स्थानमा छ। समूहको शीर्ष स्थानमा रहेर अर्को वर्ष चीनमा हुने एएफसी यु-२० एसियन कपमा छनोट हुने नेपालको सम्भावना भने समाप्त भएको छ।
नेपाल आजको खेलमा जित हासिल गर्दै प्रतियोगितालाई सम्मानजनक रूपमा समाप्त गर्ने प्रयासमा हुनेछ।
- Jigyasa media
