नेपालगन्जमा अनुगमन गर्दा ग्यास लुकाएको अवस्थामा फेला, किराना पसल कारबाहीमा

बाँके । बजारमा खाना पकाउने ग्यासको अभाव देखिएका बेला ग्यास लुकाएर राखेको अवस्थामा भेटिएपछि नेपालगन्जको एक किराना पसललाई ५० हजार रुपैयाँ जरिवाना गरिएको छ।

बाँकेका सहायक प्रमुख जिल्ला अधिकारी महेशकुमार गुरुङको नेतृत्वमा गएको अनुगमन टोलीले नेपालगन्ज–११ स्थित शङ्कर दयाल बद्रीप्रसाद प्रोभिजन स्टोरमा अनुगमन गर्दा लुकाएर राखिएका १३ वटा ग्यास सिलिन्डर फेला पारेको हो।

ग्यास लुकाएर राखिएको सूचना पाएपछि अनुगमन टोली पसलमा पुगेको सहायक प्रमुख जिल्ला अधिकारी गुरुङले बताएका छन्। अनुगमनका क्रममा ग्यास सिलिन्डर लुकाएर राखिएको पुष्टि भएपछि उपभोक्ता संरक्षण ऐन, २०७५ बमोजिम पसललाई ५० हजार रुपैयाँ जरिवाना गरिएको हो।

अनुगमनका क्रममा उक्त पसलबाट अखाद्य केही सामग्रीसमेत फेला परेको जनाइएको छ।

पछिल्ला दिनमा बजारमा खाना पकाउने ग्यासलगायत दैनिक उपभोग्य वस्तुको अभाव तथा अनियमितता भएको गुनासो बढेपछि स्थानीय प्रशासनले बजार अनुगमनलाई तीव्रता दिएको छ।

‘ग्यास छैन’ भन्दै कृत्रिम अभाव सिर्जना गर्ने, लुकाएर राख्ने वा उपभोक्तालाई असहज बनाउने गतिविधिमाथि प्रशासनले निगरानी बढाएको जनाएको छ। पछिल्ला केही दिनदेखि नेपालगन्जलगायत क्षेत्रमा खाना पकाउने ग्यासको अभाव देखिँदै आएको छ।

• Jigyasanepal