काठमाडौं। देशका विभिन्न भागमा वर्षासँगै नदी तथा खोलाहरूको बहाव बढ्ने सम्भावना रहेकाले आज (बुधबार) कम्तीमा १० जिल्लामा आकस्मिक बाढीको मध्यम जोखिम रहेको छ।
बाढी पूर्वानुमान महाशाखाका अनुसार इलाम, झापा, पाँचथर, तेह्रथुम, धनकुटा, सप्तरी, सुनसरी, मोरङ, डोटी र डडेल्धुरा तथा आसपासका क्षेत्रबाट बग्ने साना नदी र खोलाहरूको जलस्तर उल्लेख्य रूपमा बढ्न सक्ने पूर्वानुमान गरिएको छ।
महाशाखाले ती जिल्लाका नदी तटीय क्षेत्र, होचा भूभाग तथा बाढीको जोखिम रहेका स्थानमा बसोबास गर्ने नागरिकलाई विशेष सतर्कता अपनाउन आग्रह गरेको छ। वर्षासँगै साना खोला र नदीमा अचानक बहाव बढ्न सक्ने भएकाले नदी तर्ने, माछा मार्ने तथा जोखिमयुक्त क्षेत्रमा अनावश्यक आवतजावत नगर्न पनि अनुरोध गरिएको छ।
मनसुन सक्रिय रहेकाले आगामी केही दिन मौसमको अवस्थाबारे नियमित जानकारी लिन र स्थानीय प्रशासन तथा सम्बन्धित निकायबाट जारी हुने सूचनाको पालना गर्न महाशाखाले आग्रह गरेको छ।
-
Jigyasanepal
