काठमाडौँ । काठमाडौँ उपत्यकामा चिसो क्रमशः बढ्दै गएको छ। आज (मंगलबार) गरिएको सुरुवाती मापनअनुसार अघिल्लो दिनको तुलनामा उपत्यकाको न्यूनतम तापक्रम फेरि तल झरेको छ।

मौसम पूर्वानुमान महाशाखाले दिएको जानकारीअनुसार बिहान ५:४५ बजे गरिएको सुरुवाती मापनमा काठमाडौँको न्यूनतम तापक्रम ५.२ डिग्री सेल्सियस मापन गरिएको छ। हिजो (सोमबार) यही समयमा उपत्यकाको न्यूनतम तापक्रम ५.५ डिग्री सेल्सियस रहेको थियो। यसले एकै दिनमा तापक्रममा थप गिरावट आएको देखाउँछ।

यद्यपि सोमबार बिहान दोस्रोपटक गरिएको मापनमा (८:४५ बजे) काठमाडौँको न्यूनतम तापक्रम घटेर ५.२ डिग्री सेल्सियस नै कायम भएको थियो। आजको आधिकारिक न्यूनतम तापक्रम पनि बिहान ८:४५ बजे पुनः मापन गरिने मौसमविद्हरूले जनाएका छन्। प्रारम्भिक अवस्थालाई हेर्दा, उक्त समयमा तापक्रम अझै घट्ने सम्भावना रहेको अनुमान गरिएको छ।

मौसमविद्हरूका अनुसार आकाश खुला रहेमा राति र बिहान चिसो बढ्ने तथा न्यूनतम तापक्रम घट्ने गर्दछ। न्यूनतम तापक्रम घट्नुको प्रत्यक्ष असर बिहानको जनजीवनमा चिसोको अनुभूति बढ्नु हो।

मौसम पूर्वानुमान महाशाखाले काठमाडौँसहित देशका विभिन्न स्थानमा दैनिक रूपमा न्यूनतम र अधिकतम तापक्रम मापन गर्दै आएको छ। महाशाखाका अनुसार न्यूनतम तापक्रम बिहान ८:४५ बजे र अधिकतम तापक्रम साँझ ५:४५ बजे मापन गरिन्छ।

सबैभन्दा तल झरेको तापक्रमलाई न्यूनतम र दिनभरिमा सबैभन्दा माथि पुगेको तापक्रमलाई अधिकतम तापक्रम मानिने मौसम विज्ञानको मापदण्ड रहेको महाशाखाले स्पष्ट पारेको छ।

चिसो क्रम बढ्दै गएकाले विशेषगरी बालबालिका, ज्येष्ठ नागरिक तथा दीर्घरोगीलाई आवश्यक सावधानी अपनाउन विज्ञहरूले सुझाव दिएका छन्।

• Jigyasanepal