काठमाडौं, असोज १ – भदौ २४ गते ‘जेनजी’ आन्दोलनको उग्र प्रदर्शनका क्रममा राजधानीको नयाँ बानेश्वरस्थित संसद भवन पछाडिको राष्ट्रिय वाणिज्य बैंक शाखामा ठुलो लुटपाट भएको खुलेको छ।
प्रदर्शनकारीको भीडले बैंकमा तोडफोड गर्दै १८ किलोभन्दा बढी सुन र ५ करोड रुपैयाँभन्दा बढी नगद लुटपाट गरेको बैंकले जनाएको छ।
राष्ट्रिय वाणिज्य बैंकका प्रमुख कार्यकारी अधिकृत देवेन्द्र रमण खनालका अनुसार, बैंकमा भएको क्षतिको विवरण सीसीटीभी फुटेजमार्फत पुष्टि भइसकेको छ। “हामीले प्रहरीमा सम्पूर्ण प्रमाणसहित उजुरी दर्ता गरिसकेका छौं,” खनालले बताए।
जेनजी आन्दोलनकै क्रममा राजधानीका विभिन्न क्षेत्रका सरकारी तथा निजी सम्पत्ति तोडफोड र आगजनीमा परेका थिए। तर, राष्ट्रिय वाणिज्य बैंक शाखामा भएको यो लुटपाट हालसम्मकै सबैभन्दा ठूलो क्षतिको रूपमा देखिएको बताइएको छ।
प्रहरीले यस सम्बन्धमा आवश्यक अनुसन्धान अगाडि बढाइरहेको जनाएको छ।
-
Jigyasanepal
