काठमाडौं, कार्तिक २५ – मानव तस्करी आरोपमा पक्राउ परेका कोशी प्रदेशका निवर्तमान आन्तरिक मामिला तथा कानुनमन्त्री लिलाबल्लभ अधिकारीलाई अनुसन्धानका लागि आज काठमाडौं ल्याइँदैछ। जिल्ला प्रहरी कार्यालय मोरङले उनलाई पक्राउ गरी पत्राचारपछि काठमाडौं पठाउन लागेको हो।
प्रहरीको जानकारीअनुसार, अधिकारीमाथि नक्कली कागजात प्रयोग गरी तीन व्यक्तिलाई जापान पठाएको आरोप छ। टोकियो विमानस्थलमा खोटाङका दावा शेर्पा, जनक राई, र रसुवाका कञ्चन देवकोटासहित पक्राउ परेका अधिकारीलाई नेपाल फर्काइएको थियो। उनीहरूले जापान जानका लागि प्रतिव्यक्ति १० लाख रुपैयाँ बुझाएको प्रहरीले जनाएको छ।
साथै, नेकपा (एमाले) कोशी प्रदेशले अधिकारीलाई पार्टीको साधारण सदस्यसमेत नरहने गरी कारबाही गरेको निर्णय शनिबारको केन्द्रीय सचिवालय बैठकले अनुमोदन गरेको छ।
- Jigyasa media
