काठमाडौँ ।
अब राष्ट्रिय परिचय पत्रको फोटो खिच्दा सिन्दूर, टिका र राष्ट्रियता झल्कने पोसाक लगाउन पाइने भएको छ।
सिन्दूर पोते र टिका समेत हटाएर फोटो खिच्न लगाइएको बारेमा आलोचना भएपछि राष्ट्रिय परिचय पत्र तथा पञ्जीकरण विभागले सूचना जारी गर्दै अब आफ्नो संस्कृति र जातीय पहिचान जनाउने पहिरन लगाएर फोटो खिच्न सकिने जानकारी दिएको हो।
पञ्जीकरण विभागले राष्ट्रिय परिचय पत्रको जैविक विवरण लिने र आवश्यक कागजातको सम्बन्धमा रहेका द्विविधा हटाउँदै सेवा प्रवाहलाई सरल, सहज तथा प्रभावकारी बनाउन ४ बुँदे निर्देशनसमेत जारी गरेको छ।
यस्ता छन् निर्देशन
१. फोटो खिच्ने प्रक्रिया: राष्ट्रिय परिचय पत्रमा विवरण दर्ता गर्दा सेवाग्राहीको फोटो खिच्दा स्पष्ट मुखाकृति र दुवै कान देखिने गरी फोटो खिच्नुपर्नेछ। फोटो खिच्दा सिन्दूर, टिका, राष्ट्रियता झल्कने टोपी, धार्मिक, सांस्कृतिक तथा जातीय पहिचान जनाउने पहिरन लगाउन बाधा पर्ने छैन।
२.कागजातको दर्ता:राष्ट्रिय परिचय पत्रमा विवरण दर्ता गर्दा व्यक्तिले पेश गरेको नागरिकताको प्रमाणपत्र बाहेकको अन्य कागजातहरू राष्ट्रिय परिचय व्यवस्थापन सूचना प्रणालीमा स्क्यान गरी प्रविष्ट गर्ने प्रयोजनको लागि सम्भव भएसम्म सकल वा छायाप्रति सम्बन्धित व्यक्तिले सकल बमोजिम नकल ठिक छ भनी प्रमाणित गरेको आधारमा दर्ता प्रक्रिया अगाडि बढाउने।
३. नागरिकताको विवरण:व्यक्तिको नागरिकतामा केही विवरणहरू स्पष्ट नभएको खण्डमा सीआइएमएस नागरिकताको अभिलेखबाट रुजु गरी विवरण दर्ता को व्यवस्था मिलाउने।
४. अन्य जिल्लाका नागरिक: कार्यालयमा अन्य जिल्लाका नागरिकहरूले समेत राष्ट्रिय परिचय पत्रको विवरण दर्ता गर्न आवेदन पेस गरेमा विवरण दर्ताको व्यवस्था मिलाउने।
- Jigyasa media
