काठमाडौं - प्रधानमन्त्री केपी शर्मा ओलीले देशमा महिला प्रधानमन्त्री बनाउने आफ्नो चाहना रहेको बताएका छन्। शनिबार आयोजित युथ कनक्लेभ २०२४ कार्यक्रममा बोल्दै उनले आफ्नो कार्यकालमा महिला सशक्तिकरणका लागि उठाएका कदमहरूबारे चर्चा गरे।

ओलीले आफूले पहिलो महिला राष्ट्रपति, पहिलो महिला प्रधानन्यायाधीश, पहिलो महिला सभामुख, पहिलो महिला रक्षामन्त्री नियुक्त गरेको र पछिल्लो समयमा महिला मुख्यसचिव पनि बनाएको बताए। 

उनले हालै एउटा नियम लागू गरेको उल्लेख गर्दै भने, "पुरुषमात्रैको प्रतिनिधिमण्डल विदेश जान पाउँदैन। प्रतिनिधिमण्डलमा महिला सामेल हुनैपर्छ।" 

महिला प्रधानमन्त्री बनाउन चाहेको उल्लेख गर्दै उनले भने, "महिला प्रधानमन्त्री बनाउन चाहन्छु, तर यसको लागि अलिकति तयारी गर्नुपर्छ। अहिले नै दुई महिना, तीन महिना वा अर्को वर्ष महिला प्रधानमन्त्री बनाइहाल्छु भन्न अलिक कठिन हुन सक्छ, तर छिट्टै बनाउने तयारीमा छु।"

प्रधानमन्त्री ओलीले वर्तमान सरकार काम गर्नकै लागि बनेको बताउँदै देशमा परिवर्तन ल्याउने उद्देश्यले आफूले प्रधानमन्त्रीको जिम्मेवारी लिएको उल्लेख गरे। "यो सरकारसँग आश गर्नुहोस्, भर पर्नुहोस्। यो सरकार केही काम गर्नकै लागि बनेको हो," उनले भने।

• Jigyasa media