काठमाण्डौ । मकवानपुरको बकैया खोलाले एक हप्ताभित्र दुई जनालाई बगाएको छ भने जाजरकोटको झुप्रे खोलाले एक बालकलाई बेपत्ता बनाएको छ। 

बकैया खोलाले गत आइतबार ३६ वर्षीया नानुमाया तामाङलाई बगाएपछि, शुक्रबार दिउँसो रौतहटको पौराई गाउँपालिका-२ का २८ वर्षीय अकल माझीलाई बगाएको हो। मकवानपुर बकैया गाउँपालिका-६, जसपालस्थित काठमाडौं–तराई द्रुतमार्ग निर्माणमा काम गर्दै आएका माझी ससुरालीतर्फ जाँदै गर्दा खोला तर्ने क्रममा बगाएका थिए। जिल्ला प्रहरी कार्यालय मकवानपुरले माझी अझै फेला नपरेको जानकारी दिएको छ। यसअघि, नानुमाया तामाङको शव गत सोमबार बाराको कोल्हबी नगरपालिकामा फेला परेको थियो। उनी वैदेशिक रोजगारीमा रहेका छोरालाई बिदा गरेर घर फर्किंदै थिइन्। 

यस्तै, जाजरकोटको नलगाड नगरपालिका-३, कैनामा ६ वर्षीय महान थापा साथीहरूसँग पौडी खेल्न गएका बेला झुप्रे खोलाले बगाएको छ। उनी शनिबार बिहानदेखि बेपत्ता भएका हुन्। स्थानीय प्रहरी र गाउँलेहरूले दिनभर खोजी गरे पनि बालक फेला परेका छैनन्। वडाध्यक्ष बद्री पन्तका अनुसार, खोलामा करिब दुई–तीन किलोमिटर दुरीसम्म खोजी गरिएको भए पनि सफल हुन सकेको छैन। 

खोलामा बाढीको कारण बढ्दो दुर्घटनाले जनजीवन असुरक्षित बनाएको देखिन्छ, यद्यपि बेपत्ता भएका व्यक्तिहरूको खोजी कार्य अझै जारी छ।

• Jigyasa media