चितवन – नारायणगढ–मुग्लिन सडकखण्डको सत्रकिलो भन्ने स्थानमा बस र इलेक्ट्रिक हायस गाडी ठोक्किएर भएको दुर्घटनामा चार जनाको मृत्यु भएको छ भने ६ जना घाइते भएका छन्।
आज बिहान करिब ३ बजे मुग्लिनबाट नारायणगढतर्फ जाँदै गरेको बा.प्र. ०६–००१ ज ०२९८ नम्बरको हायस र नारायणगढबाट मुग्लिनतर्फ आउँदै गरेको बा.प्र. ०३–००१ ख २८१२ नम्बरको बस आपसमा ठोक्किँदा यो दुर्घटना भएको हो।
जिल्ला प्रहरी कार्यालय चितवनका अनुसार, मृतक चारै जना हायसमा सवार यात्रु हुन्, जसमध्ये गोर्खाको आरुघाट गाउँपालिका–१ का ४० वर्षीय राजबहादुर गुरुङको सनाखत भएको छ। मृतकहरुमध्ये अन्य तीनजनाको पहिचान हुन बाँकी छ।
दुर्घटनामा बस चालक मकवानपुर हेटौंडाका ४० वर्षीय सूर्यविक्रम विष्टलाई प्रहरीले नियन्त्रणमा लिएको छ भने बसका सहचालक काठमाडौं महानगरपालिका–३२ का ३० वर्षीय भोजविक्रम शाह सामान्य घाइते भएका छन्।
घाइतेमध्ये चार जनाको भरतपुरको नयाँ मेडिकल कलेजमा उपचार भइरहेको छ भने दुई जनालाई सामान्य उपचारपछि घर पठाइएको छ।
- Jigyasa media
