जोमसोम, कात्तिक १० – मुस्ताङ जिल्लामा लेक लागेर तीन दिनभित्र दुई विदेशी नागरिक र एक नेपाली पर्यटकको मृत्यु भएको छ। जिल्ला प्रहरी कार्यालय मुस्ताङका अनुसार मुक्तिनाथ दर्शन गर्न आएका एक अमेरिकी नागरिक, एक भारतीय नागरिक, र एक नेपाली नागरिकको लेक लागेर मृत्यु भएको हो।

डीएसपी सूर्यबहादुर बोगटीका अनुसार, मृतकमा काठमाडौं निवासी ७० वर्षीय कुलनारायण जोशी रहेका छन्, जो मुक्तिनाथ दर्शनपछि जोमसोमको होटलमा बसेका थिए। राति अचानक टाउको दुख्ने समस्या देखिएपछि उनी होटलको डाइनिङमा अचेत भए, जहाँबाट उनलाई अस्पताल पुर्‍याइएको थियो तर चिकित्सकले उनलाई मृत घोषणा गरे।

यसैगरी, अमेरिकन नागरिक मिलो गोल्डसेजर (६३), मुक्तिनाथ दर्शन गरेर फर्कंदै गर्दा होलिडे क्याम्पमा अचेत अवस्थामा भेटिए। प्रहरी र होटलका कर्मचारीको सहयोगमा अस्पताल पुर्‍याउँदा उनको मृत्यु भइसकेको थियो।

शुक्रबार मुक्तिनाथ दर्शन गरेर फर्किएकी भारतको मुम्बई निवासी ६९ वर्षीया शारदा महादेव लगडे पनि लेक लागेर अचेत भएपछि अस्पताल पुर्‍याइएकी थिइन्, जहाँ चिकित्सकले उनलाई मृत घोषित गरे।

डीएसपी बोगटीका अनुसार, मुस्ताङको उच्च क्षेत्रमा स्वास्थ्य परीक्षणविनै भ्रमण गर्दा पर्यटकलाई लेक लाग्ने समस्या देखिने गरेको छ। ज्येष्ठ नागरिक र दीर्घ रोगी पर्यटकलाई यो जोखिम उच्च हुने बताइएको छ।

• Jigyasa media