काठमाडौं । सरकारको मुख्यसचिवमा एकनारायण अर्याल नियुक्त भएका छन्। बिहीबार बसेको मन्त्रिपरिषद् बैठकले गृहसचिव अर्याललाई मुख्यसचिवमा नियुक्त गरेको एक मन्त्रीले जानकारी दिएका छन्।

मुख्यसचिव लीलादेवी गड्तौला अनिवार्य अवकाशमा जाँदै गरेकाले अर्याललाई मुख्यसचिवमा नियुक्त गरिएको हो। गड्तौला भदौ १५ गतेदेखि अनिवार्य अवकाशमा जानेछिन्। उनले गत साउन १० गते मुख्यसचिवको जिम्मेवारी सम्हालेकी थिइन्।

अर्यालले २०४६ माघ ४ गते नायब सुब्बाको रूपमा निजामती सेवामा प्रवेश गरेका थिए। उनले २०५१ फागुन ४ गते शाखा अधिकृत, २०५८ माघ ६ गते उपसचिव, २०६७ फागुन १९ गते सहसचिव र २०७६ फागुन १८ गते सचिवको जिम्मेवारी सम्हालेका थिए। निजामती सेवामा उनले ३४ वर्ष ७ महिना ९ दिन बिताइसकेका छन्।

अर्याल यसअघि मकवानपुर, काठमाडौं र तनहुँका प्रमुख जिल्ला अधिकारीको रूपमा कार्यरत भइसकेका छन्। गृह मन्त्रालयमा सहसचिवको रूपमा उनले गृह प्रशासन सुधार, योजना निर्माण र कार्यान्वयनमा महत्त्वपूर्ण योगदान गरेका थिए।

• Jigyasa media