प्युठान— प्युठान जिल्लाको माण्डवी गाउँपालिका-२ अधेरीमा मानव कङ्काल फेला परेको छ। पुरानो र लामो समयदेखि खाली रहेको दलबहादुर खत्रीको घरमा कङ्काल भेटिएको जिल्ला प्रहरी कार्यालय प्युठानका प्रवक्ता, प्रहरी निरीक्षक केशव केसीले जानकारी दिएका छन्।
स्थानीयहरूले आइतबार बाँदर धपाउन गएको क्रममा अचानक पानी परेपछि ओत लाग्न घरभित्र गएर कङ्काल देखेका हुन्। कङ्काल कपडाले ढाकेर प्लास्टिकले बेरेको अवस्थामा ढोकामाथि राखिएको फेला परेको हो।
खाली घरमा मानव कङ्काल भेटिएको घटनापछि, जिल्ला प्रहरी कार्यालय प्यूठानले तत्काल छानबिनका लागि प्रहरी परिचालन गरिसकेको छ। घटनास्थलमा सोमबार प्रहरी नायब उपरीक्षक ईश्वर थापाको नेतृत्वमा प्रहरी टोली पुगेको थियो।
प्रहरीले कङ्काललाई प्यूठान अस्पतालमा ल्याएर डिएनए परीक्षण र शव परीक्षण गरिने बताएको छ। परीक्षण रिपोर्टका आधारमा थप अनुसन्धान अगाडि बढाइने प्रवक्ता केसीले बताएका छन्।
( रासस)
- RSS
