नवलपरासी ।
हुप्सेकोट गाउँपालिका–१ जुगेपानीमा एक भयावह पारिवारिक घटनाले स्थानीय समाज स्तब्ध भएको छ। आफ्नै घरभित्र भएको विवाद निर्घात कुटपिटमा बदलिँदा ६० वर्षीय रामबहादुर विकले ज्यान गुमाएका छन्।
जिल्ला प्रहरी कार्यालयका प्रहरी नायब उपरीक्षक मधु नेपालका अनुसार मृतकका ३० वर्षीय छोरा सन्तकुमार विकले गए राति घरायसी विवादकै बीच बुबामाथि कठोर आक्रमण गरेका थिए। लगातारको कुटाइबाट गम्भीर घाइते भएका रामबहादुरलाई उपचारका लागि मध्यविन्दु प्रादेशिक अस्पताल पुर्याइए पनि उपचारकै क्रममा मृत्यु भएको प्रहरीले जनाएको छ।
घटनापछि फरार हुन खोजेका अभियुक्त सन्तकुमारलाई प्रहरीले तत्काल नियन्त्रणमा लिएको डीएसपी नेपालले जानकारी दिए।
प्रहरीका अनुसार घटनाको वास्तविक कारणबारे थप अनुसन्धान भइरहेको छ।
यस घटना एक परिवारभित्रको द्वन्द्वले कसरी ज्यानै लिने गम्भीर रूप लिन सक्छ भन्ने कटु यथार्थ उजागर गरेको स्थानीयबासीले बताएका छन्।
-
Jigyasanepal
