सिराहा, फागुन १८ — पूर्व–पश्चिम राजमार्गअन्तर्गत सिरहाको गोलबजार नगरपालिका–३ जमनटोकी नजिक आइतबार राति बस र मोटरसाइकल आपसमा ठोक्किँदा दुई युवकको ज्यान गएको छ भने एक जना गम्भीर घाइते भएका छन्।
प्रहरीका अनुसार गोलबजारबाट पूर्वतर्फ जाँदै गरेको स.५ प ४७५९ नम्बरको मोटरसाइकल र धरानबाट भैरहवातर्फ गइरहेको लु२ख १०८५ नम्बरको बस एकआपसमा ठोक्किँदा दुर्घटना भएको हो। मोटरसाइकलमा सवार तीनै जना गम्भीर घाइते भएका थिए।
दुर्घटनामा धनगढीमाई नगरपालिका–८ का ३७ वर्षीय सन्तोष महतो र २० वर्षीय अमन रायको स्थानीय स्वास्थ्य संस्थामा उपचारका क्रममा मृत्यु भएको इलाका प्रहरी कार्यालय गोलबजारका प्रमुख प्रहरी निरीक्षक सुधन केसीले जानकारी दिए।
उक्त दुर्घटनामा १७ वर्षीय धिरज मण्डल सख्त घाइते भएका छन्। उनको हाल विराटनगरस्थित अस्पतालमा उपचार भइरहेको छ।
मृतकहरूको शव पोस्टमार्टमका लागि लहानस्थित रामकुमार उमाप्रसाद प्रादेशिक अस्पतालमा राखिएको प्रहरीले जनाएको छ।
प्रहरीका अनुसार तीनै जना एउटै मोटरसाइकलमा सवार थिए। दुर्घटनापछि बस र चालकलाई नियन्त्रणमा लिई घटनाबारे थप अनुसन्धान अघि बढाइएको छ।
रातिको समयमा तीव्र गतिमा सवारी सञ्चालन, ओभरलोड र लापरबाहीले राजमार्गमा दुर्घटना बढ्दै गएको भन्दै स्थानीयले ट्राफिक निगरानी कडाइ गर्न माग गरेका छन्।
-
Jigyasanepal
