डोटी । - सुजङ्ग अस्पताल, राजपुरमा उपचारका क्रममा ९ वर्षीया बालिका रजनी भुलको मृत्यु भएको छ। दिपायल सिलगढी नगरपालिका-३ निवासी लोकेन्द्र भुलकी छोरी रजनी खेल्दा लडेर बायाँ हात भाँच्चिएपछि उपचारका लागि अस्पताल ल्याइएकी थिइन्। सामान्य उपचारपछि उनलाई बुधबार साँझ अप्रेसनको तयारीका क्रममा बेहोस गर्न औषधी दिएलगत्तै रियाक्सन भएको बताइएको छ, जसले गर्दा बालिकाको मृत्यु भएको हो।
जिल्ला प्रहरी कार्यालय डोटीका अनुसार घटना अनुसन्धानका लागि उपचारमा संलग्न तीनजना चिकित्सकलाई नियन्त्रणमा लिइएको छ। नियन्त्रणमा लिइएका चिकित्सकहरूमा डा. राजमणि यादव, डा. सुरेन्द्र कुमार चौधरी, र डा. अभिषेक यादव छन्।
अस्पतालका प्रशासन प्रमुख अर्जुन बलायरले औषधीको रियाक्सनका कारण बालिकाको मृत्यु भएको हुन सक्ने जानकारी दिएकाछन्।
- Jigyasa media
