काठमाडौँ ।दोरम्बा शैलुङ गाउँपालिका–३ लेखर्कमा गएको भयानक पहिरोमा परी मृत्यु हुनेहरूको संख्या आठ पुगेको छ। 

भदौ ९ गते आइतबार बिहान आएको पहिरोले चार घर बगाउँदा ११ जना हराएका थिए। जिल्ला प्रहरी कार्यालयका प्रमुख प्रदीपकुमार सिंहका अनुसार, मङ्गलबारसम्म आठजनाको शव फेला परेको छ।

मङ्गलबार एक महिलाको शवको केवल बायाँ गोडाको पैतालाको भाग भेटिएको थियो। हराइरहेकी श्रीमती बिन्दा पहरीको सनाखत उनका श्रीमान् कुमार पहरीले नङ पालिस र बाङ्गो औलाका आधारमा गरेका थिए। त्यसपछि शव परिवारको जिम्मा लगाइएको थियो।

शनिबार राति परेको अविरल वर्षाका कारण पहिरो गएको थियो, जसमा ११ जना बेपत्ता भएका थिए। हराइरकमध्ये एकजनालाई जीवितै उद्धार गरिएको थियो भने आइतबार छजनाको शव फेला पारिएको थियो। त्यसपछि थप एक शव र मङ्गलबार फेला परेको पैतालाको भागले मृतकको संख्या आठ पुगेको हो।

अझै पनि सोही वडाका ५५ वर्षीय काले पहरी र ५० वर्षीय झ्याइपुरी पहरी बेपत्ता छन्। प्रहरीले उनीहरूको खोजी कार्य जारी राखेको छ। यस पहिरोमा परी ज्यान गुमाउनेहरूमा ३० वर्षीया चण्डिका श्रेष्ठ, उनका १८ महिनाका छोरा आयुष श्रेष्ठ, ५७ वर्षीया उर्मिला पहरी, ३० वर्षीय सन्दीप पहरी, ११ वर्षीय सन्तोष पहरी, र १४ वर्षीय विज्ञान पहरी रहेका छन्। यी सबैको शव आइतबार नै फेला परेपछि परीक्षण गरी परिवारलाई जिम्मा लगाइएको थियो।

• Jigyasa media