काठमाडौँ, असोज १९ — Jigyasa Nepal Desk

नेपाल यो वर्ष पनि विपद्को कठोर परीक्षाबाट गुज्रिरहेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार २०७९ सालको वैशाखयता देशभर विभिन्न विपद्जन्य घटनामा २८५ जनाले ज्यान गुमाएका छन्, भने २७ जना अझै बेपत्ता छन्।

प्राधिकरणकी प्रवक्ता शान्ति महतका अनुसार केवल आज आइतबार (असोज १९) मै देशभर ४४ जनाको मृत्यु भएको पुष्टि भएको छ। तीमध्ये ३७ जना मात्रै इलाममा पहिरोमा पुरिएर ज्यान गुमाएका हुन्। आजको विपद्को प्रभाव ५० जिल्लामा फैलिएको छ।

🔹 सबैभन्दा घातक विपद् — सर्पदंश

प्राधिकरणले सार्वजनिक गरेको अभिलेख अनुसार वैशाखयता सबैभन्दा धेरै सर्पदंशका कारण ८६ जनाको मृत्यु भएको छ।

त्यसपछि पहिरोले ४६ जनाको र चट्याङले ४५ जनाको ज्यान लिएको तथ्यांक सार्वजनिक गरिएको छ।

🔹 बाढी, आगलागी र हावाहुरी पनि घातक

यस अवधिमा बाढीबाट ३० जना, भारी वर्षाबाट ६ जना, आगलागीबाट २३ जना, हावाहुरीका कारण ८ जना, जनावरको आक्रमणबाट २२ जना, र लेक लागेर १९ जनाको मृत्यु भएको छ।

त्यस्तै, बाढीमा २३ जना, पहिरोमा ३ जना, र जनावरको आक्रमणमा १ जना बेपत्ता भएका छन्।

🔹 हजारौँ परिवार प्रभावित

प्रवक्ता महतका अनुसार हालसम्म देशभर ४ हजार ६५ वटा विपद्जन्य घटना दर्ता भएका छन्। ती घटनाबाट १ हजार ७२ जना घाइते भएका छन् र ७ हजार २११ परिवार प्रत्यक्ष प्रभावित भएका छन्।

🔹 इलाममा सबैभन्दा ठूलो मानवीय क्षति

आज मात्रै इलाम, सूर्योदय, देउमाई, माङसेबुङ, माइजोगमाई र सन्दकपुर क्षेत्रमा पहिरो, बाढी र भारी वर्षाको कारण दर्जनौँ घरहरू क्षति पुगेका छन्। सशस्त्र प्रहरी र नेपाली सेनाको टोलीले उद्धार कार्य तीव्र रुपमा सञ्चालन गरिरहेको छ।

नेपालका पहाडी, हिमाली र तराई भूभागमा निरन्तर मौसमीय अस्थिरताका कारण बाढीपहिरो, चट्याङ र हावाहुरी जस्ता विपद् सामान्य भइसकेका छन्। तर, यस वर्षको तथ्यांकले देखाउँछ — विपद् केवल मौसमको घटना होइन, राज्यको तयारीको कमजोर प्रतिबिम्ब पनि हो।

• Jigyasanepal