काठमाडौं । सरकारले भ्रष्टाचार मुद्दामा रहेको पाँच वर्षे हदम्याद हटाउन तयार भएको छ। शुक्रबार राज्य व्यवस्था तथा सुशासन समितिको बैठकमा गृहमन्त्री रमेश लेखकले यसबारे सरकारको तयारी रहेको जानकारी दिए।
गृहमन्त्री लेखकले बैठकमा बोल्दै भ्रष्टाचार मुद्दामा हदम्याद हटाउनुपर्ने धारणा राख्दै सरकार यसबारे सकारात्मक रहेको बताए। उनले भने, “धेरै माननीयज्यूहरूले हदम्याद हटाउनुपर्ने कुरा उठाउनुभएको छ। भ्रष्टाचारका मुद्दामा जहिले पनि अनुसन्धान हुनुपर्छ भन्ने धारणा धेरैको छ। हदम्याद हटाउन सरकार तयार छ।”
साथै, भ्रष्टाचारको मुद्दा दायर भएपछि सम्बन्धित व्यक्तिलाई निलम्बन गर्ने वा नगर्ने भन्ने विषयमा पनि थप छलफल आवश्यक रहेको गृहमन्त्री लेखकले बताए। उनले भने, “कसैमाथि भ्रष्टाचारको मुद्दा लागेपछि निलम्बन गर्ने कि नगर्ने भन्ने विषयमा समितिमा छलफल गरी टुंगोमा पुग्नुपर्छ।”
- Jigyasa media
