जेहनाबाद: भारतको बिहार राज्यस्थित जेहनाबाद जिल्लाको मखदुमपुरस्थित बाबा सिद्धनाथ मन्दिरमा सोमबार भएको भागदौडमा कम्तीमा ७ जनाको मृत्यु भएको छ भने अन्य ९ जना घाइते भएका छन्। घटनाको पुष्टि गर्दै जेहानाबादका जिल्ला प्रशासक अलङ्कृता पाण्डेले मृतक तथा घाइतेको जानकारी दिए।
हाल स्थिति नियन्त्रणमा रहेको बताउँदै पाण्डेले भागदौड कसरी सुरू भयो भन्ने विषयमा तत्काल कुनै जानकारी प्राप्त नभएको जनाए।
जेहानाबादका प्रहरी प्रमुख दिवाकर कुमार विश्वकर्माले जिल्ला प्रशासक र प्रहरी उपरीक्षकले घटनास्थलमा पुगेर घटनाको जानकारी लिइरहेको र शवहरू पोस्टमार्टमका लागि पठाइँदै गरेको बताए।
यसैबीच, प्रहरी अधिकारी विकास कुमारले घटनाप्रति दुःख व्यक्त गर्दै, उचित सुरक्षा व्यवस्था हुँदा पनि यस्तो दुःखद घटना घट्न पुगेको उल्लेख गरे। घटनाको बारेमा विस्तृत अनुसन्धान भइरहेको छ।
(रासस/एएनआई)
- RSS
